2014年一場鉅變，造就咗Mr Law近年專注中學數學及理科補底。近8至9成學生都係補數學為主。唔少家長指自己小朋友數底差同埋做數慢，要操數。無錯做數慢係要操數，但點操都係一個好大嘅學問，之後嘅文章有機會再講，
咁就算要操數，都要搵一個適合嘅導師，或者去一間合適嘅補習社先得, right?
首先，想請私人補習老師的家長要小心考慮
請私人補習老師，一般家長只係會睇導師嘅成績同埋自我介紹，最常見嘅就係用心教學，專科專教，細心，有耐性，有好多練習俾學生做blah blah blah。係，無錯就係因為無經驗，所以只可以講呢啲。
Law Sir當年嘅情況都係差唔多，加上私人補習導師，男仔阿sir係比較輸蝕。通常女學生家長都偏好女導師，而男學生家長呢，都係想請女導師。呢一點作為男導師嘅Law Sir絕對明白，始終女導師點都好似好過男導師咁。
幸好，讀大學期間都有好幾個學生，可以俾Law Sir累積一下教學經驗。聰明的學生好好教，進步好快，而且家長都對我很客氣，感謝好些家長當年嘅信任。
如果各位家長想請大學生做私補導師，教自己嘅小朋友，就要預咗做白老鼠。因為佢好可能只係教咗一段好短嘅時間，教學經驗唔夠。若果小朋友好聰明，但係抗拒去大補習社，絕對係一個好嘅選擇。
若果選擇補習班，要先了解清楚自己小朋友嘅能力，選合適嘅補習社
好多因素影響家長選擇補習社，第一固之然是價錢，第二係導師嘅穩定性，第三係每班人數。但好多家長都忽略咗最重要嘅因素→自己嘅小朋友，到底適合哪種教學模式?
大型補習社、專科班適合中上程度學生
市面上中學補習班嘅教學模式，最常見就係「單向授課班」，亦即係「專科班」。原因好簡單，所有教材都可以預先準備，連邊個位講乜笑話都預備好，保證無冷場又可以令學生記憶深刻；有不少導師更會「自創」唔少「必殺技」，搞到無補嘅同學好似唔識就好蝕咁。而且，為令學生覺得自己好勁，導師嘅語速會好似機關槍咁掃射，唔講得快就好似唔夠pro咁。
呢類補習社適合能力中上嘅學生，band 1校內成績全級頭60名內，band 2校內成績頭20名內，band 3... 頭5名內吧。用眼望，耳聽，腦記學習嘅學生，就非常適合。
不過留意返，如果學生上課時有教程外嘅問題，導師好可能唔會即刻答，一來擔心拖慢預設嘅進度，二來。。。。。大家可以估下點解
3至5人小班教學適合任何程度學生
第二種教學模式就係互動式教學，透過問與答去加深學生對課題認知，給機會學生trial and error去訓練勇於嘗試嘅思維。
這類補習班的人數通常是3-5人一班，由於利潤遠遠不及「單向授課班」，多數中小型補習社的做法是請一些大學生/大專生來教，大約3成學費給導師，同一個大課室內幾個導師加十幾名學生困獸鬥，嘈吵程度可想而知。
若果由經驗導師教授，絕對可取。但若只是由兼職導師教授，很可能會出現三兩個月就換阿sir/missy嘅情況，一來學生好易學到無心機，二來導師質素時好時壞，每次轉老師都要望天打掛。
附圖已經係疫情前嘅上堂境況，宜家每張枱只係坐1個學生，5張枱即係5個學生。今日下午每個學生都認真地做練習，又未有嘢問時，真係可以靜到烏蠅飛過都聽到。自從改為5人一班之後，感謝各位家長支持，只係剩底少量學額，可以喺呢度睇到餘下學額數目。
Law Sir 近月將疫情後製作嘅教學片喺band 2及band 3 數學(英文卷)嘅學生做咗測試，似乎效果非常良好，稍作微調後會製作成網上課程供元朗區以外家長/學生選購，主力還是補底，希望可以幫助這班學數學到一頭煙嘅學生。若果在外補了很久都沒有效果，屆時不妨考慮一下。