好多家長知道我已經有兩個仔嘅時候，覺得好驚訝。
我係「襟睇」啫，其實都已經三十幾歲人。一個好想做平凡父親嘅人。
但係，我唔可能做一位普通嘅父親，我大仔有嚴重自閉症，中度智障；細仔還可以，只係輕度自閉症，有ADD(專注力不足)，疑似讀寫障礙，智力正常，將會入讀主流小學。將來照顧少一個，已經萬分感恩。
詳見Facebook Page: 迷路的媽媽
經常發夢嘅細仔，激到媽媽生蝦咁跳
2022年7月18日晚上，老婆大人又再怒火中燒。明白的，細仔又雲遊太虛，到晚上11點都未完成功課。媽媽已經發火了，細仔仍是一臉茫然，唔知自己做錯咗乜。
作為父親，我有責任話俾佢知佢有事做得唔夠好。我用認真堅定的語氣，細聲叫佢過嚟我面前，然後用平淡的語氣了解佢仲有乜未做。即使媽媽已經開始失控，我的情緒仍然under control.
我都好佩服自己嘅耐性，仲有心情同佢練拼音，鼓勵佢嘗試讀英文生字，話佢知讀錯咗都無所謂；再教佢抄生字要最少一次過記兩三個字母，令佢抄嘅時候效率更高；再陪佢玩記憶遊戲，叫佢記3個字母後，故意冚埋本書，等佢覺得好玩。而其實佢係做得到，從中可以提升佢嘅自信心，一舉多得。
其實我只係將經驗傳遞俾我細仔：讀錯字有乜所謂? 有人由細到大都無讀錯過任何一個字咩? 我都讀錯好多字，俾人笑到面黃；人哋笑係一件事，學返啱就可以了；抄字抄得慢，因為記憶力唔夠強，其實可以一步一步咁簡單train。唔好理人點睇，最重要係過到自己嗰關。
我也曾打仔 ，但因為工人姐姐，我不再打仔了
大仔中度智障，會無原因大笑大叫(喺我哋角度嚟講)，亦好多時無法跟從很簡單的指令。我們不是聖人，其實也只是普通人。當生活迫人，心情欠佳，也會有無法控制情緒的時候。打仔，相信9成父母都有做過，喺大家未醒覺嘅時候，記住只可以打手腳，唔可以打身軀。
我已經好耐無再打過仔，甚至我老婆打(當然只係小打)，我都無打，全因為工人姐姐嘅一句說話。我記得最後一次係，哥哥發大脾氣打我哋，我hold住佢之後嘗試將佢對我哋做嘅嘢，對佢做返一次，俾佢知道會痛(但哥哥痛覺遲鈍)。工人姐姐見到後講咗一句：「唔好打哥哥呀，佢會發脾氣。」
嗰一下好似突然「叮」一聲咁提醒我，哥哥發脾氣係因為我哋發脾氣。之後我用盡全身氣力摟住哥哥，之後一直係咁錫佢，直到佢開始calm down，變返正常嘅哥哥。
由嗰一日開始，我無再因為哥哥發脾氣而惱，我好努力咁練習逆來順受。哥哥發怒打我嗎? 唔緊要，我擋就好了，唔好還手，要摟住佢，錫返佢。好多時我都搞到周身傷，而因為哥哥開始長大，一下抓落皮膚、一拳飛過嚟都唔係講笑。但再傷，我都唔會再惱佢或者再還手。
哥哥一直在訓練我的耐性
沒有他，我相信我對學生的耐性也非常有限。因著哥哥，我對學生也有著無止盡的忍耐力。
唔明點做題目？唔緊要，我再轉過一個方法教過；
做錯咗題目？唔緊要，知道點解錯，改返好，下次盡量唔好再錯同一樣嘢就好了；
無做功課？唔緊要，但係追唔上進度唔係我無做足本份，係同學仔你自己無做足本份，進步得慢咁就係你自己要承受返嘅後果，你ok我ok；
相信不難解釋點解有啲同學進步得咁快，但係有啲又進步得咁慢。